АҞӘА, абҵара 8 – Sputnik, Асмаҭ Ҵәыџьԥҳа. Тҟәарчал араион аҵаратә система аҭагылазаашьа дазааҭгылеит аҵараҟәша аиҳабы Дмитри Мышәба.
Мышәба иҳәеит араион аҟны ишыҟоу абжьаратә школқәа 16, ахәыҷтәы-қәыԥштә спорт школк, иара убас ахәыҷбаҳчақә хԥа. Аҵаҩцәа - 1656 - ҩык ыҟоуп.
2020 шықәса жьҭаарамза инаркны жәабран 2021 шықәсанӡа аепидҭагылазаашьа иахҟьаны ашколқәа аркын.
"Иҟаз аҭагылазаашьа иахьмырԥшкәа ҳарҵаҩратә еилазаара ирылшеит апрограмма зегьы рызнагара, ажәеизатәи акласс аҵаҩцәа алҳаргеит, реиҳараҩык Аԥсуа ҳәынҭқарратә университет иҭалеит", - иҳәеит Мышәба.
Иара убасгьы иазгәеиҭеит, иахьазы араион аҟны аҿкчымазара шрыдбалоу жәҩык арҵаҩцәеи, 14-ҩык ахәыҷқәеи.
Мышәба иажәақәа рыла, аҩбатәи, аԥшьбатәи, Агәыбедиатәи абжьаратә школқәа аиҭашьақәыргылара рҭахуп. Иара убас ахәыҷтәы- ақәыԥштә аспорт школ аспорт зали.
Ашколқәа рыҟны арҵаҩцәа рҭагылазаашьаз Аҳәынҭқарра ахада иҟаиҵаз азҵаара аҭак ҟаҵо, Мышәба иҳәеит аусуҩцәеи арҵаҩцәеи разымхара азҵаара шыҟам.