ГӘДОУҬА, абҵара 10 - Sputnik. Аԥсны ахада Аслан Бжьаниа Гәдоуҭа араион 2020-2022 шш. рызтәи Аинвестициатә программа аҳәаақәа ирҭагӡаны Гәдоуҭа имҩаԥысуа аусурақәа гәеиҭеит, ахәшьара риҭеит.
Аобиектқәа реиҳарак аӡымангагақәеи ацрыҵцарҭақәеи ирыдҳәалоуп.
"Аӡымангагақәеи ацрыҵцарҭақәеи ирыдҳәалоу аобиектқәа рҿы Аинвестпрограммала ицо аусурақәа хар рымамкәа ицоит. Инагӡоу ыҟоуп, уаанӡа ишысҳәахьаз еиԥш, Аинвестпрограмма анагӡашьа сахылаԥшлои", - иҳәеит ахада.
Иара иазгәеиҭеит арҭ аусурақәа шаҟа ирласны, насгьы хаҭабзиара ҳаракыла инагӡахо аҟара ауааԥсыра рыԥсҭаазара арманшәалоит.
"Ара хаҭала сахьаҭааз иҟоу-шыҟоу збеит, лкаақәак ҟасҵеит. Акапиталтә ргылара аусбарҭеи анардадаҩцәеи ҳрыцхраалоит, уаҳа ари азҵаарахь ҳахнымҳәларц азы, уажәазы аусқәа цәгьамкәа имҩаԥысуеит", - ҳәа азгәеиҭеит Бжьаниа.
Атәыла ахада Абӷархықә ақыҭан дыҟан, уаҟа аӡымҩангагатә цәаҳәақәа рышьҭаҵара иаҿуп, иара убас Афон ҿыцгьы днеит, уаҟагьы аӡымҩангагақәа рзеиԥш система акапиталтә ремонт ацара иаҿуп.
Афон ҿыц аӡымҩангагақәа реиҭашьақәыргылара сынтәа актәи аетап мҩаԥысуеит. Уажәазы иазгәаҭоуп ԥшь-километрак рышьҭаҵара, урҭ рахьтә ҩ-километраки 300 метраки шьҭаҵоуп", - иҳәеит Аԥсны акапиталтә ргыларазы аусбарҭа аиҳабы Ҭемыр Агрба.