АҞӘА, абҵара 10 – Sputnik. Петербург 60 шықәса еиҳаны изхыҵуеи акраамҭатә чымазарақәа змоуи рзы хымԥадатәи алаҵаҟаҵара аларгалеит ҳәа аанацҳауеит РИА Новости Петербург иҟоу Роспотребнадзор аусбарҭа анапхгаҩы, асанитартә ҳақьым хада Наталиа Башкетова лықәҵара ҵаҵӷәыс иҟаҵаны.
Ари адокумент инақәыршәаны хымԥадатәи апрофилактикатә иммунизациа иаҵанакуеит 60 шықәса еиҳаны изхыҵуеи акраамҭатә чымазарақәа змоуи, аиҳаракгьы арыԥҳа-бронхқәа рсистема, агәы-датә система, аендокринтә система рганахьала агәамбзиарақәа змоу.
Злаҵаҟаҵара хымԥадатәиу атәылауаа ркатегориахь иаҵанакуеит ааглыхратә, аиҭаусадуларатә, аргыларатә, атранспорт, атранспорттә инфраструктура аусзуҩцәагьы.
Ара иарбоуп аҳаирбаӷәаза "Пулково" аусзуҩцәа, авиаеилахәыра аперсоналгьы абрахь иналаҵаны, иара убасгьы Санкт-Петербург абаӷәаза аусзуҩцәеи апассаџьыртә баӷәаза "Морской фасад" аусзуҩцәеи. Аиқәыԥхьаӡа иаҵанакуа ахаҿқәа ҩ-еилазаарак змоу алаҵа актәи адоза, ма еилазаарак змоу алаҵа ҟарҵароуп 2021 шықәса ԥхынҷкәын 15 рҟынӡа, аҩбатәи адоза – 2022 шықәса ажьырныҳәа 15 рҟынӡа. Убри аан алаҵаҟаҵара иаҵанакыроуп 80% аусзуҩцәа.
Петербург агубернатор Александр Беглов аҳәамҭа ҟаиҵеит, арҭ иусуратәымыз амшқәа рзы аепидемиологиатә ҭагылазаашьа еиӷьхеит ҳәа.