АҞӘА, абҵара 18– Sputnik, Асмаҭ Ҵәыџьԥҳа. Аԥсны ахада Аслан Бжьаниа Гәылрыԥшь араион аҿы усутә ныҟәарыла иҟазаараан Аинвеспрограммала иҟарҵо амҩақәа гәеиҭеит.
Араион ахада Аслан Бараҭелиа иҳәеит Гәылрыԥшь араион аҿы Аинвеспрограммала амҩақәа ааба шеиҭашьақәыргылоу.
Ахада даҭааит Баҳадыр Баӷба ихьӡ зху 1,5 километра иҟоу амҩа. Амҩа еиҭашьақәыргылан 2020 шықәсазы Аинвестпрограмма аԥаразоужьрала. 7000 метрԥшьыркца зҵазкуа аргылара иахҭынҵан 6 миллионки 375 нызқьмааҭ. Анардадкылаҩ - "Аԥснырегионргылара".
Ахада иара убасгьы ибеит 3,5 километр иҟоу Акурорт амҩа. Ара 12 нызқь метрԥшьыркца акаҭран ықәҵоуп, иахҭынҵоуп 11 миллиони 205 нызқьмааҭ.
Анаҩс, Аҳәынҭқарра ахада даҭааит аҳабла Миасниково, араион ахада Бжьаниа изеиҭеиҳәеит араатәи амҩаду 2022 шықәсазы аиҭашьақәыргыларатә усурақәа шарбаз, аха 2021 шықәсазы ауааԥсыра Жәлар реизара адепутат Саид Ҳаразиа ианиҳәа ашьҭахь заанаҵы аусурақәа мҩаԥыргартә аҭагылазаашьа шыҟалаз.
Уажәазы 1,5 километра акаҭран ықәҵоуп, иаанханы иҟоу 200 метра роуп.
Бараҭелиа иажәақәа рыла, аԥарашәара мҩаԥгахоит 2022 шықәсазы. Аусурақәа рыхәԥса 4 миллионки 215 нызқь мааҭ итәоит.