АҞӘА, абҵара 19 – Sputnik, Бадраҟ Аҩӡба. Еиҭашьақәдыргылаз аԥырҩы-акосмонавт Владимир Комаров ибаҟа аадыртит Аҟәатәи абжьаратә школ №6 ашҭаҿы абҵара 19 азы.
Ашкол адиректор Лолита Кациаԥҳа еиҭалҳәеит ашкол шаартыз 1963 шықәсазы, актәи аушьҭра шымҩаԥгаз 1965 шықәсазы, 1968 шықәсазы Аԥснытәи АССР Иреиҳаӡоу Асовет аӡбрала ашкол ихьӡ шахҵаз Асовет Еидгыла ҩынтәтәи Афырхаҵа, аԥырҩы- акосмонавт Владимир Комаров. 1983 шықәсазы ашкол 20-шықәса ахыҵраан ашкол ашҭаҿы иргылан абаҟа.
"ХХ ашәышықәса 60-тәи ашықәсқәа рзы раԥхьаӡа акәны ауаҩы акосмос ахь дыԥрит. 1967 шықәсазы Владимир Михаил-иԥа ҩынтә акосмос ахь иԥрыз раԥхьатәи космонавтуп. Убри аан акосмос ахьынтә ахынҳәраан иҭахаз драԥхьатәиуп. Ҳашкол иахылаԥшуан акосмос азы аусурақәа мҩаԥызгоз аҟәатәи афизико-математикатә техникатә институт. Ишырҳәо еиԥш, ҳазшаз иҭаххеит Владимир Комаров ихьӡ ҳашкол ахҵара", - ҳәа лҳәеит лара.
1992-1993 шықәсқәа рызтәи Аԥсны аџьынџьтәылатәи аибашьраан абаҟа ааха аҭан.
"Абаҟа аиҭашьақәыргыларазы алшара ҳамамызт. Убри азы аҳәара ҟаҳҵеит Москва аиҳабыра рахь ацхырааразы. Иҟоуп аиҿкаара – Урыстәылатәи афедерациа амотоспорт. Урҭ ҳара ацхыраара ҳарҭеит", - ҳәа лҳәеит лара.
Уи адагьы абаҟа иҭашьақәыргылара ианалага Жәлар реизара адепутат Лаша Ашәба, ашкол аушьҭымҭацәа – Аҟәатәи ақалақьтә еизара адепутат Инал Ҭыжәбеи апрограммист Инар Саӡбеи ацхыраара ҟарҵеит.
Уи адагьы Москва аиҳабыра ашкол иаҭахыз атехника – амоноблокқәа, аноутбукқәа, амониторқәа, асистематә блокқәа, аклавиатура уҳәа 800 000 мааҭ рыхә аарышьҭит.