АҞӘА, абҵара 20 - Sputnik. Урыстәыла Аԥсны ацхыраара анаҭоит акоронавирус ахәшәтәразы зыхә цәгьоу ахәшәқәа "Актемра", "Артлегиа", "Илсира" раахәараҿы. Абри атәы аанацҳауеит агәабзиарахьчара аминистрра апресс-маҵзура.
"Урыстәыла агәабзиарахьчара аминистрра ари азҵаараҿы ацхыраареи адгылареи ҳарҭоит", - иҳәеит Едуард Быҭәба Виктор Фисенкои иареи реиԥылара алкаа ҟаҵо.
Аԥсны агәабзиарахьчара аминистри Урыстәыла агәабзиарахьчара аминистр актәи ихаҭыԥуаҩи ҳтәылаҟны аепидҭагылазаашьа зеиԥшроу иалацәажәеит.
"Урыстәылатәи аган ирҳәеит, аҿкчымазара аҟынтәи ҳауаажәлар рыхәшәтәраҿы ацхыраара аҟаҵара ишазхиоу. Иара убас еиқәшаҳаҭхеит аҳақьымцәа рзы онлаин-конференциақәа рымҩаԥгаразы", - иҳәеит Быҭәба.
Быҭәбеи Фисенкои иалацәажәеит Аҟәа зыргылара азгәаҭоу акардиологиатә центр, амедицинатә бгаԥсаҟаҵареи, QR-коди Аԥсны агәабзиарахьчара ирынаҭо асертификатқәеи рызхаҵареи, иара убас аҩ-тәылак ргәабзиарахьчаратә министррақәа ирыбжьоу аиқәшаҳаҭрақәа инарықәыршәаны русеицура.