АҞӘА, абҵара 23– Sputnik. Аԥсны Урыстәылаҟа аицеиқәшаҳаҭразы инанашьҭит жәа-миллиард мааҭ рыхә абизнес-проектқәа азинҷыдатә кредит рыҭараз апроектқәа. Абри атәы лҳәеит ахада имҩаԥигоз аилацәажәараҿы аекономика аминистр Кристина Озган.
Аслан Бжьаниа анапынҵа ҟаиҵеит еиҭа апроектқәа алырхырц, избанзар Москваҟа ирышьҭуа зегьы ирықәшаҳаҭымхар ауеит.
Аҳәынҭқарра хада Москва иҟазааразы аихшьаалақәа ҟаҵо иҳәахьан 2022 шықәса аҩбатәи аԥшьбара инаркны апрограмма аҩбатәи ахәҭа ишалаго.
2015 шықәсазы Аԥсны аекономика аминистрреи Москва Аинвистициатә маҵзуреи иаԥшьыргеит апрограмма. Уи аҳәаақәа ирҭагӡаны урыстәылатәи абанкқәа хԥа аԥснытәи анаплакыҩцәа акредитқәа рырҭеит 10% азинҷыдатә зыԥҵәала.
Аиндаҭлара иалахәын 40 инареиҳаны инвестициатә проектқәа. Аԥарақәа рзоужьын иаиааиз быжь-проектк. Акредит иартәеит миллиардки 200 миллион мааҭ.