АҞӘА, абҵара 23 - Sputnik. Аԥсны еицырдыруа аҳәынҭқарратәи аполитикатәи усзуҩ Нестор Лакоба имузеи аиҭашьақәыргылара иалагоит ҳәа азгәаҭан ахада Аслан Бжьаниа арҿиаратәи аҭҵаарадырратәи интеллигенциа алархәны имҩаԥигаз аилацәажәараҿы.
Аиԥылараан аҭҵаарадырреи аҵареи рзы ахада иабжьгаҩ Нугзар Логәуа дрылацәажәеит арҿиаратәи аҭҵаарадырратәи еиҿкаарақәа ирымоу ауадаҩрақәа.
"Ауадаҩрақәа ыҟоуп. Урҭ еиҳагьы иарҵауылеит акоронавирустә инфекциа апандемиа. Ирацәоуп еиҭашьақәыргылатәу аҭоурых-культуратә ҵакы змоу ахыбрақәа. Арахь иаҵанакуеит Лакоба имузеигьы. Аусураз иманшәалоу ахыбра рымам Аԥсны ашәҟәыҩҩцәа реидгыла. Амилаҭтә библиотекаҿы уадак иҩноуп. Аиҭашьақәыргылара аҭахуп амузыкатә ҵараиурҭа ахыбра. Зегь аамҭакала аҭыԥ рықәҵара залыршахом. Арҭ азҵаарақәа зегьы рыӡбаразы иаҭахуп хәҭа-хәҭала еихшаны аплан аҟаҵара", - ҳәа иҳәеит иара.
Аиԥылара алахәылацәа ргәаанагарыла аиҭашьақәыргылара аҭахуп Лакоба имузеи адагьы 30-40 шықәсқәа раан аполитикатә репрессиақәа ирылаӡыз рмузеигьы.
Аҭоурыхҭҵааҩ Валери Бигәуаа иазгәеиҭеит амузеи аиҭашьақәыргылараан ишыргылатәу Нестор Лакоба иԥшәмаԥҳәыс Сариа Лакобеи урҭ рԥа Рауфи рбаҟагьы.
"Аҳәынҭқарра амузеи еиҭашьақәнаргылозар ажәлар абаҟақәа рзы аԥара еизыргоит", - ҳәа иҳәеит иара.
Аслан Бжьаниа иҳәеит амузеи хымԥада ишеиҭашьақәыргылахо.
"Амузеи аҳәынҭқарра ишьақәнаргылоит. Зҵаара ыҟаӡам. Убри аан иазырхиатәуп амузеи аконцепциа. Иахәҭоу аԥара азгәаҭаны аусурақәа ирылагатәуп 2022 шықәсазы", - иҳәеит иара.
Аԥсны еицырдыруа аҳәынҭқарратәи аполитикатәи аусзуҩ Нестор Лакоба диит лаҵара 1, 1893 азы Лыхны ақыҭан. Аԥснытәи АССР Совнарком ахантәаҩы иԥсҭазаара далҵит ԥхынҷкәын 28, 1936 шықәсазы Қарҭ иҟазаараан.