АҞӘА, абҵара 25– Sputnik, Асмаҭ Ҵәыџьԥҳа. Ашықәс иалагазар аҭыԥантәи абиуџьет иаланагалеит 140 миллион мааҭ. Ари аплан аасҭа 6 миллионк иреиҳауп ҳәа иҳәеит аилацәажәараҿы араион ахада Алхас Ҷыҭанаа.
Иара иажәақәа рыла, араион аҿы инхоит 12 нызқьҩык, 40 процент рҟынӡа аус руеит, бжьаратәла ауалафахәы 15-16 нызқь мааҭ ыҟоуп. Аҵара аусхк иазоужьуп 37 миллион мааҭ.
1900 гектар адгьыл аҵанакуеит араион, аха аиҳара аус адырулом. Ареспубликатә биуџьет аҟынтәи ақыҭанхамҩа иазоужьуп 5,8 миллион мааҭ, аҭыԥантәи абиуџьет аҟынтәи – 4 миллионк.
2021 шықәсазы афымцамч ахархәара 57,9 миллион киловатт-сааҭ итәеит. Убри аан ашәаразы ауал 13,8 миллион артәоит. Аизгара апроцент - 38,9%.
Алхас Ҷыҭанаа иҳәеит араион аҿы акоронавирус рыдбалоуп 2736–ҩык, иахьазы ичмазцәоуп 136-ҩык ҳәа. Алаҵа ҟарҵахьеит 183-ҩык.
Араион ахада иазгәеиҭеит ацәгьоурақәа еиҳа имаҷхеит ҳәа. 2020 шықәса абри аамҭазы 53 цәгьоура ашәҟәы иҭагалазар, 2021 шықәсазы – 39 роуп иҭагалоу. Ацәгьоура хьанҭақәа 2020 шықәсазы 23 азгәаҭан, 2021 шықәсазы - 11. Ашәҟәы иарбан 2586 амҩатә ԥҟара аилагара, ихацыркын анаркотикқәа реикәыршаразы 13 ус.