Уаанӡа иара напыла мацара акәын урҭ шаԥиҵоз, аха ҩымз раԥхьа иара иҟазарҭа ҳаамҭа иақәшәо амаруга адигалеит. Уи зыбзоурахаз Еиду Амилаҭқәа реиҿкаара Аҿиаразы апрограммахь инаишьҭыз апроект иахьазыразхаз ауп, миллион мааҭк инеиҳаны аԥара изалырхын, иара иҟазарҭа иақәнагоу маругала еиқәиршәеит.
Ҳаамҭа иақәшәо атехнологиақәа иус дырманшәалеит, идырццакит. Уаанӡа ачамгәыр аҟаҵара ҩымчыбжь ицәақәыӡуазҭгьы, уажәшьҭа ари амаруга иабзоураны мчыбжьык ала далгоит. Уи анеибиҭалак, иахәҭоу абжьы ахылҵаанӡа аус адиулоит. Зны-зынла уи азы ҽнак-ҩымш анизымхогьы ыҟоуп.
Арухаа инапы иадыруеит аԥхьарца, аҩымаа, ахымаа, аҿарпын, абыкь аҟаҵашьа.