АҞӘА, абҵара 30 - Sputnik. Аԥсны аус зуа Жәларбжьаратәи еиҳабыратәым аиҿкаарақәа рыпроектқәа Адәныҟатәи аусқәа рминистрраҿы ақәшаҳаҭра аиуроуп, ҳәа аанацҳауеит адәныҟаполитикатә усбарҭа асаит.
"Аҵара, агәабзиарахьчара, ақыҭанхамҩа, егьырҭ агуманитартә хырхарҭақәа рганахь ала имҩаԥысуеи иазыԥхьагәаҭоуи апроектқәа уажәшьҭарнахыс рымҩаԥгара ҟалоит Адәныҟатәи аусқәа рминистрра ақәшаҳаҭрала", - ҳәа аҳәоит адырраҭараҿы.
Аԥсны Аҳәынҭқарра ахад иусдҵа "Аԥсны Аҳәынҭқарра иаку адәныҟатә политика амҩаԥгараҿы Аԥсны Аҳәынҭқарра адәныҟатәи аусқәа рминистрра ароль азы" инақәыршәаны Аԥсны ААР аҿаԥхьа иқәыргылоуп аусдҵа – ООН жәларбжьаратәи аиҿкаарақәеи амаҵзурақәеи русура аишьашәалара амҩаԥгара.
АИХқәа рзы Адәныҟатәи аусқәа рминистр ихаҭыԥуаҩ Иракли Ҭыжәба иҟаиҵаз ахҳәааҿы иазгәеиҭеит Аԥсны иҟоу аиҿкаарақәа иазыԥхьагәарҭо апроектқәа зегьы ААР аҟынтәи ақәшаҳаҭра аиура шхымԥадатәиу.
Абҵара 29 азы имҩаԥысит Адәныҟатәи аусқәа рминистр Инал Арӡынбеи Аԥсны Аҳәынҭқарра аҵакыраҿы аусура мҩаԥызго жәларбжьаратәи иеиҳабыратәым аиҿкаарақәа рхадацәеи реиԥылара. Аминистр иазгәеиҭеит ԥхьаҟагьы аусеицура дшазыхиоу.