АҞӘА, ԥхынҷкәын 7 - Sputnik. Урыстәылатәи Афедерациаҟны иҟоу Аԥсны Аҳәынҭқарра Ацҳаражәҳәарҭа абазаҿы аҿар адгылара рызҭало Ацентр "Аԥсны аԥеиԥш" Москва иаартхоит ҳәа иҳәеит Адәныҟатәи аусқәа рминистр Инал Арӡынба.
Апроект аусура хацыркхоит 2022 шықәса алагамҭазы.
Аԥсны Адәныҟатәи аусқәа рминистрра асаит аҿи Урыстәыла иҟоу Аԥсны Ацҳаражәҳәарҭа асаит аҿи адгыларазы азыҳәа анашьҭра ауеит. Иара убасгьы аусура иаладыргоит иаку аҭел ҳтәылауаа рзы.
Аԥсни Урыстәылеи инхо аԥсуа ҿар рхаҭарнакцәа Ацентр ахь инеилар рылшоит Урыстәыла аҵаратә усҳәарҭақәа рҭалара, аԥышәахысра, аҟазара аизырҳара, аамҭала аусурҭа аԥшаара уҳәа азҵаарақәа рылацәажәаразы.
Ацентр "Аԥсны аԥеиԥш" Москва аартра хра аиуеит ҳтәылауаа хаҭала рыцхырааразы, аԥсуа ҿар рыҿиара аҭагылазаашьа бзиақәа азыԥшааразы, аԥхьагылаҩцәа қәыԥшцәа рыҩаӡара ала аимадарақәа рышьақәыргыларазы.