АҞӘА, ԥхынҷкәын 9 – Sputnik, Бадраҟ Аҩӡба. Абоксер Игор Адлеиба ареитингтә еиндаҭлара мҩаԥигоит Екатеринбург ԥхынҷкәын 11 азы, ҳәа Sputnik иазеиҭеиҳәеит аспортсмен именеџьер Артур Адлеиба.
"Хымԥада, ҳара даҽа гәтакқәак ҳаман, Игор ԥхынҷкәын 8 азы Гәыбаадәы Даӷьысҭантәи аспортсмен Георги Челохсаев диндаҭлараны дыҟан, аха апандемиа иахырҟьаны ақәгылара ажьырныҳәамза 8 ахь ииаган, аха уигь рыԥсахит. Краснодартәи атәылаҿацә агубернатор идҵала ауаа рацәа злахәу аусмҩаԥгатәқәа аанкылоуп ажьырныҳәа 20 рҟынӡа", - иҳәеит иара.
Игор дықәымгылеижьҭеи акрааҵуеит. Аҵыхәтәантәи ашықәс азы знык аринг ахь днеит. Уажәы апромоутертә еилахәыра Украинатәи аспортсмен Асиф Керимов дицықәгыларц иднагалеит.
"Ари аспортсмен ҳидымнагалацт. Игор иаасҭа дыԥсыҽуп узҳәом. Игор ԥхынҷкәын 8 азы Даӷьысҭантәи аспортсмен Георги Челохсаев диндаҭлараны дыҟан. Иҽазыҟаиҵон. Аҽа программак аус адиуылон. Мчыбжьык ала аҽеиҭакра уадаҩуп. Икапан иагирхароуп. Ари уадаҩуп аха Игор илшо ҟиаҵоит", - иҳәеит аспортсмен именеџьер.
Ари аиндаҭлара аԥсуа боксер изы ижәиԥшьтәиуп апрофессионалтә ринг аҿы.
Игор Адлеиба - WBO аверсиала аҿар рыбжьара адунеи ачемпион, изныкымкәа Аԥсны ачемпион, Урыстәылатәи Афедерациаҿы жәларбжьаратәи атурнирқәа рҿы даиааихьеит, акикбоксинг азы адунеи Ахраҿа занашьоу, Аԥсны абокс азы аспорт азҟаза, Урыстәыла аспорт азҟазарахь акандидат.