АҞӘА, ԥхынҷкәын 10– Sputnik, Бадраҟ Аҩӡба. 1941-1945 шықәсқәа раантәи аибашьра ду аҟны хабарда ибжьаӡыз Аԥсны атәылауаа, аибашьцәа рыуацәа-рҭынхацәа рыԥшаараз аусура иазку афильм "Аԥшаара" аԥхьарбара мҩаԥысит Аҟәа.
"2016 шықәса раахыс Аԥсны, Атәылахьчара аминистрра адгыларала имҩаԥысуеит амемориалтә проект "Ахьӡ архынҳәара". Апроект ахықәкы – Ар ҟаԥшь аибашьцәа, хабарда ибжьаӡыз ма иҭахаз рҭоурых гәалашәара ахьчароуп. Ҳара еиқәҳархар ҳҭахуп Аџьынџьтәылатә еибашьра ду алахәылацәа, амилаҭқәа зегьы рдоуҳатәи рҭоурыхтәи беиара. Апроект жәларбжьаратәи аҟазшьа амоуп. Имҩаԥысуеит Ҟрым, Киргизиа. 10 нызқь рҟынӡа жәла ИАР ареспубликақәа хәба ирзынаҳашьҭхьеит", - еиҭеиҳәоит апроект анапхгаҩы Григори Скворцов.
Апроект иахәҭа хаданы иҟоуп адокументалтә кино аҭыхра ҳәа иҳәеит иара.
"Ауснагӡатә иалахәуп Аҟәатәи арратә ҵараиурҭа акурсантцәа. 2016 шықәса аахыс акурсантцәа апроект иалахәуп. Абри аамҭала 129 ҭаацәара ҳаԥшааит. Иахьа иӡыраагоит адокументалтә фильм "Аԥшаара". Ари арратә курсантцәа русура иазкуп" иҳәеит Скворцов.
Ареспубликаҿ 1992-1993 шықәсқәа рзы архивқәа блит азы апроект "Ахьӡ архынҳәра" агәакьацәа рыԥшаара акыр ауадаҩра ацуп.
"Ари зегьы афильм аҿы иубарҭоуп. Афильм абиуџьет 700 нызқьмааҭ иҟоуп. Афильм Аԥсны анҭыҵ акинофестивальқәеи ателеканалқәеи рҿы идурбар алшоит" - иҳәеит иара.
Афильм иалахәуп апрофессионалтә актиорцәа, хабарда ибжьаӡыз рыуацәа. Апроект "Ахьӡ архынҳәра" аҳәаақәа ирҭагӡаны иҭыху аҩбатәи фильм ауп "Аԥшаара". Асценари автор, арежиссер Дмитри Статеинов еиҭеиҳәеит актәи афильм афырԥҳәызба Леила Агрԥҳа лҭоурых аҩбатәи афильм аҿгьы ишацҵо.
"Лҭоурых ҳарҭбааит. Лхәыҷра ҭаҳхит. Аԥшаарақәа шцоз инарҭбааны иааҳарԥшит. Афильм егьырҭ афырхацәагь алоуп, иаҳҳәап Иван Паниухно, аконцлагер иҭакыз. Иара дҳаԥшааит Хосҭа. Акурсантцәа рыбзоурала егьырҭ ауааԥсырагьы рҭахцәа рҭоурыхқәа еилыркааит. Леила Агрԥҳа "Жди меня" ала лаб иԥшаара дашьҭан. Илылшоз зегь ҟалҵон", - иҳәеит иара.
Афильм 45 минуҭ ицоит. Аус адыруылон хышықәса.
"2018 шықәсазы аҭыхра ҳалагеит, ҳалгеит 2019 шықәсазы. Аҽа шықәсык ихаҳарҭәаауан, иацаҳҵон", - еиҭеиҳәоит Статеинов.
Москва ажьырныҳәа анҵәамҭазы идырбахоит, Аԥсны – акультуратә уснагӡатәқәа рымҩаԥгара азин шыҟалалак. Афильм аҭыхра иацхрааит Москва аиҳабыреи, Аԥсны Ахәаахәҭра-ааглыхратә палатеи, Атәылахьчара аминистрреи.