Иахьа ԥхынҷкәын 14 рзы Аҟәа ақалақь ахадара аҿари аспорти русқәа рзы аусбарҭеи Владислав Арӡынба ихьӡ зху Аибашьратә фырхаҵара Ахьӡ-аԥша амузеии еицымҩаԥыргоит Лаҭатәи атрагедиа аан иҭархаз ргәалашәара иадҳәалоу ауснагӡатәқәа.
"Акциа ҳалагоит асааҭ 16:27 рзы. Ари аамҭазы ауп авертолиот Тҟәарчал ианыҵԥрааз. Ацәашьқәа аҳаркоит аекспозициа ахьыҟоу амузеи аҩныҵаҟа, урҭ ҳаманы ҳдәылҵуеит Ахьӡ-аԥша апарк ахь. Иаҳаркуеит 87 цәашьы иҭахаз зегьы рыхьӡала акака. Ари аусмҩаԥгатә аан "Ареквием" Моцарт иаԥҵамҭа аҳәалоит. Аҿымҭара аминуҭ ашьҭахь ари амш иазку ажәеинраалақәа, ашәақәа галоит амузеи аҟны", - лҳәеит Беииаԥҳа.
Аплатформа "Гәыма" аҟны Лаҭатәи атрагедиа иазку Есма Џьыкырԥҳа авторс дызмоу афильм дырбахоит ахәылбыҽха асааҭ фба рыбжазы, лҳәеит Мзиа Беииаԥҳа.
Иаҳа инарҭбааны аицәажәара шәаҳар шәылшоит аудиофаил аҟны.