АФОН Ҿыц, ԥхынҷкәын 17 - Sputnik, Бадраҟ Аҩӡба. Аԥсны ахада Аслан Бжьаниа Афон ҿыц аӡымҩангага аремонт шымҩаԥысуа гәеиҭеит.
Аусурақәа Аԥсны асоциал-економикатә ҿиараз Аинвестициатә программа 2020-2022 аԥарақәа рыла имҩаԥыргоит.
Акапиталтә ргылара аиҳабы Ҭимур Агрба иажәақәа рыла, аихшаратә ҳақәа рремонт аԥаразоужьра алимит 100 миллиони 664 нызқьмааҭ шыҟоу. Аусурақәа ҩышықәса ҳәа еихшоуп. Сынтәа иазырхоуп 17 миллиони 919 нызқьмааҭ. 15 310 метра аҟынтәи 4600 метра аӡымҩангагатә цәаҳәақәа шьҭаҵоуп.
Аӡымҩахгага иахҭынҵоуп 100 миллионк, иахьазы 17 миллиони 242 нызқьмааҭ шәоуп. Аусурақәа ҩышықәса ҳәа еихшоуп. 15 227 метра аҟынтәи 5 470 метра аӡымҩангагатә цәаҳәақәа шьҭаҵоуп.
Ахада иҳәеит аусурақәа рхаҭабзиара ҳаракызар шакәу, ақалақь ахадара ари аус ахылаԥшра рыдиҵеит.