АҞӘА, ԥхынҷкәын 21 – Sputnik. Аԥсуа драматә театр аҟынтәи аҿагыларатә акциа алахәылацәа Жәлар Реизара ахыбрахь идәықәлеит.
Уи аԥхьа амитинг алахәылацәа Атәыла ахада иахь инарышьҭит Жәлар ракзаара Афорум аиҳабы Аслан Барцыци, ауаажәларратә ветерантә еиҿкаара "Аруаа" аиҳабы Ҭимур Гәлиеи, дара дҵас иҟарҵон Атәыла ахада аҿагыларатә акциа алахәылацәа рахь ддәылҵырц. Барцыц иҳәеит, Аслан Бжьаниа уи мап шацәикыз.
"Абас еиԥш аҭак ҳаиҭеит: "Ишәҳәаз саҳаит, сааԥхьарақәа рҟны исҳәахьеит сгәаанагара, амитинг ахь анеира ахәҭам", - иҳәеит Барцыц.
Аилацәажәара иалахәын Аԥсны аԥыза-министр Александр Анқәаб, ахада Иусбарҭа анапхгаҩы Алхас Кәыҵниа, Аԥсны аҳәынҭқарратә хьчара амаҵзура аиҳабы Дмитри Дбар.