АҞӘА, ԥхынҷкәын 24 - Sputnik. Аҟәа инхо, ихәыҷаахыс ихымхәоу актәи агәыԥ иаҵанакуа рсоциалтә шәарақәа зықь мааҭ рҟынӡа ирыцырҵеит, ҳәа аанацҳауеит аҳҭнықалақь ахадара асаит.
Ихәыҷаахыс ихымхәоу рсоциалтә шәара азыԥҵәа ацҵара азҵаара шьҭыхын ԥхынҷкәын 23 рзы имҩаԥысыз Аҟәатәи ақалақьтә еизара аилатәараҿы. Аилатәараҟны аҳҭнықалақь 2022 шықәсазтәи абиуџьет шьақәнарӷәӷәеит.
"Уаанӡатәи ақалақьтә еизара адепутатцәа 16 шықәса рҟынӡа зхыҵуа ахымхәацәа рзы ашәарақәа 600 мааҭ инаркны 1000 мааҭ аҟынӡа ихаргалеит. 16 шықәса рышьҭахь амедкомиссиа актәи агәыԥ ианаҵадырклак ашьҭахь 600 мааҭ роуа еиҭалагоит. Иахьа ари ашәара зықьмааҭ рҟынӡа ихаагалартә аҭагылазаашьа ҳауит", - иҳәеит Аизара ахантәаҩы Иракли Харчылаа.
Иара иҳәеит асоциалтә еиқәыршәара Аусбарҭаҿы ашәҟәы ишҭагалоу 191-ҩык.
Харчылаа иажәалагала еицҿакрыла ирыдыркылеит. Аӡбамҭа амчра аиуеит 2022 шықәса ажьырныҳәамза инаркны.