АҞӘА, ԥхынҷкәын 30 - Sputnik. Аԥсны Алхратә комиссиа хада ахантәаҩыс далхуп Дмитри Маршьан, ҳәа аанацҳауеит "Аԥсныпресс" амаҵзура.
АКХ ахантәаҩы ихаҭыԥуаҩыс далхуп Виачеслав Кәакәасқьыр, амаӡаныҟәгаҩыс - Ануш Хоџьикиан.
Аԥсны АКХ ахантәаҩи уи ихаҭыԥуаҩи ауалафахәы рзыршәоит, уи аҟнытә дара арҵаратә, аҭҵаарадырратә, арҿиаратә усура ада даҽакы рнапы аларкыр ҟалом. Алхратә комиссиа хада шьақәгылоуп 15-ҩык рыла.
Апарламент ааҩык АКХ акомиссиа алахәылацәа алнахит: Омар Смыр, Наталиа Кәарацхьелиаԥҳа, Лаша Шамба, Инна Кәарҷиаԥҳа, Роман Гьериа, Алиас Бранӡиа, Виачеслав Кәакәасқьыр, Асҭамыр Ашәба.
Аслан Бжьаниа иусԥҟа инақәыршәаны Аԥсны алхратә комиссиа хада аилазаарахь иаҭоуп: Адгәыр Ашәба, Саида Быҭәԥҳа, Дмитри Маршьан, Инал Хышба, Ануш Хоџьикиан, Омари Шаҭ-иԥа.
Аԥсны Жәлар Реизара-Апарламент ахь алхрақәа мҩаԥгахоит хәажәкыра 12, 2022 шықәсазы.