АҞӘА, ажьырныҳәа 8 - Sputnik. Аԥсны АҶА амедицинатә усбарҭа аусзуҩцәа Ԥсҳәынтәи Аҟәаҟа дааргеит зшьапы ԥҵәаз ахаҵа, ҳәа аанацҳауеит аиқәырхаратә усбарҭа апресс-маҵзура.
Авертолиот "МИ-2" ԥырит асааҭ 10:10 рзы асабша ажьырныҳәа 8 азы адырра аныҟала.
Аԥсны АҶА амедусзуҩцәа ачымазаҩ иаразнак раԥхьатәи ацхыраара ирҭеит. Анаҩс Ареспубликатә хәшәтәырҭахь дааргеит.
Ԥсҳәы - Аԥсны аҭыԥқәа зегь реиҳа анеира ахьыуадаҩу 760 метра ашьха ҳаракыраҿы иҟоу қыҭоуп. Уахь унеир улшоит Ауадҳараҟа узлацо амҩала аԥхынтәи аамҭазы. Егьи абжьара - ҳаирпланла мацара.
2020 шықәса аԥхынразы Аҟәа-Ԥсҳәы автобус бжьысуан, аха уи мызқәак роуп аус анауз.