АҞӘА, ажьырныҳәа 10 - Sputnik. Аа-нызқьҩык рҟынӡа ауааԥсыра аанкылоуп Ҟазахсҭан ицо аиҿагыларақәа рҵыхәала ҳәа аанацҳауеит РИА Новости атәыла аҩнуҵҟатәи аусқәа рминистрра адыррақәа инрықәыршәаны.
"Атәыла ахы-аҵыхәа иаанкылоуп 7939-ҩык. Амилаҭтә гвардиеи азинхьчаҩцәеи еицхырааны Алмата аџьармыкьақәа ҩба рҿы иааныркылеит 207-ҩык. Ирымырхит ирӷьычыз амашьынақәа 5, атауарқәа, абџьар", - рҳәеит аиҳабыра р-Telegram-канал аҿы ицәырыргаз аҩнуҵҟатәи аусқәа рминистрра адыррақәа.
Атәыла аҳәынҭқарратә маӡаныҟәгаҩ Ерлан Карин аҳәамҭа ҟаиҵеит Ҟазахсҭан аиҿагыларақәа еиҿыркааит еилахәу атеррористтә гәыԥқәа атәылаҿы аҭагылазаашьа шьақәҟьаны амчра ахырҳәарц азы. Карин ишиҳәаз ала, Ҟазахсҭан ажәларазы ахара здыло Ҟазахсҭан иҷыдоу амаҵзурақәа ишырҳәо.
Иара убасгьы иара иазгәеиҭеит Ҟазахсҭан аконтртеррористтә операциа иалахәу аҭыԥантәи иҷыдоу агәыԥқәа шракәу: Арыстан, Арлан, Беркут, иара убас атәылахьчара аминистрра агәыԥқәа.
Ҟазахсҭан аҿагыларатә акциақәа ирылагеит ашықәс ҿыц ҳшынҭалаз еиԥш. Мангистаутәи анефҭааглыхратә раион ақалақьқәа Жанаозени Актауи рҟны инхо ауааԥсыра амитингқәа рахь ицәырҵит амашьына абылтәы ҳасабла иҭарҭәо аӡшьартә нефҭтә газ ахә ҩынтә иахьышьҭыҵыз иаҿагыло.
Ажьырныҳәа 4 рзы атәыла аиҳабыра аҿагылара аазырԥшуа ауаа ирхаҵгыланы агаз ахәԥса аларҟәра ишазыхиоу шырҳәазгьы, ауаа уи иааннамкылеит, аҿагыларатә акциақәа егьырҭ ақалақьқәа рахьгьы ииасит. Алма-Ата, ареспублика ԥыхьатәи аҳҭнықалақь аҿы ажьырныҳәа 4, 5 рзы аҿагылара аазырԥшуази аполициаа еиҿанагалеит, аполициа ахы ианархәеит агази алашарабжьытә рԥжәагақәеи. Ҟазахсҭан зегь аҿы аинтернет аҿыхын, ателеканалқәа русура аанкылан, иалагалан аҭагылазаашьа ҷыда.
Ашьыжь ажьырныҳәа 5 рзы Ҟазахсҭан ахада Токаев атәыла аиҳабыра ԥхьатәара ишьҭит ишьақәгылаз аибарххарақәа рзы ахара рыдҵо. Иара убас адырра ҟаиҵеит Ашәарҭадаратә хеилак ахантәаҩыс иара дшыҟалаз, уаанӡа иҟаз атәыла раԥхьатәи ахада Нурсултан Назарбаев ихаҭыԥан.
Ажьырныҳәа 6 ауха Токаев имҩаԥигеит Ашәарҭадаратә хеилак иара инапхгарала ираԥхьатәихаз аилатәара, уи аҟны аҳәамҭа ҟаиҵеит Ҟазахсҭан ишьақәгылаз аҭагылазаашьа "аҳәынҭқарра акзаара ҵызшәаауа" шакәу, адыррагьы ҟаиҵеит ОДКБ ахь аҳәара шыҟаиҵаз "атеррористтә шәарҭара ахыхраҟны ирыцхрааразы".
Ажьырныҳәа 7 рзы Токаев аҳәамҭа ҟаиҵеит атеррористцәа рыҽшаанырымкыло, урҭ ишрылоу аҳәаанырцәынтә иааз, ажәагьы рниҵеит зыбџьар шьҭазымҵаз зегьы шҭадырхо. Уи адагьы, иара иазгәеиҭеит ҭынчрала агәынамӡара ааазырԥшуаз атәылауаа зегьы рҭахрақәа зегьы ишрызхьаԥшыз.