АҞӘА, ажьырныҳәа 17 – Sputnik. Афымцатә цәаҳәа "Мысра" аремонт иалгеит ҳәа адырра ҟанаҵоит "Амшынеиқәафымцамч".
Гәдоуҭа араион зегьы аҿы фымцалашара ауааԥсыра ирыҭоуп, уаанӡа иалагалаз аԥкрақәа аԥыхуп.
Авольтҳарак цәаҳәа "Мысра" аҟны афымца цәаҳәа ааха шаиуз еилкаахеит ажьырныҳәа 15 ашьыжь. Аиҭашьақәыргыларазы уахь инеиз аусуцәа иаразнак рнапынҵақәа ирылагеит, аусурақәа цонаҵы еилкаахеит даҽа цәаҳәакгьы ааха шамаз.
Амш иалагӡаны аусурақәа зхыркәшамхеит, убри аҟнытә Гәдоуҭа араион алашара анашьҭразы аԥкрақәа алагалан.