АҞӘА, ажьырныҳәа 18 – Sputnik, Бадраҟ Аҩӡба. Раԥхьатәи Жәларбжьаратәи ашахматтә турнир "Аԥсны.Тамшь-Village 2022" мҩаԥгахоит ажьырныҳәа 22 - 23 рзы Тамшь, ҳәа Sputnik иазеиҭеиҳәеит ашахмат азы Афедерациа ахада Константин Ҭыжәба.
"Атурнир алахәхара зҭаху маҷҩым. Иахьазы Гагра, Гәдоуҭа, Гал, Тҟәарчал, Очамчыра рҟынтәи 60-ҩык рҟынӡа еизаагахьеит. Иҟоу аҭагылазаашьа азгәаҭаны иҳармаҷит, аҭамзаара шьҭаҵо апандемиа иахырҟьаны уаҳа ауаа ҳазҳадкылом ҳәа алаҳәара ҟаҳҵахьеит", - ҳәа иҳәеит иара.
Аԥснытәиқәа рыдагьы атурнир иалахәхоит ашахматасыҩцәа Москва, Санкт-Петербург, Обнинск, Ростов, Краснодар, Шәача рҟынтәи.
"Урҭ рыбжьара иҟоуп агроссмеистерцәа, Европеи адунеии рчемпионцәа. Атурнир аҿы аиндаҭлара ӷәӷәа ҟалоит. Ҳгәыӷуеит ҽааны апандемиа ҟаларым, алахәылацәагьы ирыцлап ҳәа. Ашахматтә турнир есышықәса имҩаԥаагалап ҳәа ҳаҟоуп", – иҳәеит Ҭыжәба.
Атурнир аҳәаақәа ирҭагӡаны асанитартә ҭахрақәа ирықәныҟәоит.
"Ахәмарра иалахәхоит аҵаҩцәа, аветеранцәа, арԥарацәа, аҭыԥҳацәа. Атурнир ҩымш имҩаԥысуеит", - ҳәа азгәеиҭеит Афедерациа ахада.
Sputnik Аԥсны аинформациатә дгылара анаҭоит Жәларбжьаратәи атурнир "Аԥсны.Тамшь-Village 2022".