АҞӘА, ажьырныҳәа 19 – Sputnik, Сариа Кәарцхьиаԥҳа. Риҵаҟа амҩа адыркит асықәгагатә техника ахьыԥхасҭахаз азы ҳәа Sputnik акорреспондент илзеиҭеиҳәеит апарк абнахьчаҩ хада Ҭенгьиз Џьергьениа.
Ажьырныҳәа 18 - 19 рзы Риҵатәи ареликттә парк аҿы 50 сантиметра рҟынӡа асы леит. Ашьхараҿгьы амҩа 24-тәии 40-тәии акилометрақәа рыбжьара ҩ-сыԥсак леит.
"Асыԥса леит Риҵанӡа унаӡаанӡа. Иара убасгьы амҩа ианаҳалеит ихжәаз аҵлақәа. Аусзуҩцәа неины аҭыԥ дрыцқьеит. Уажәы атехника аремонт аназыруа ҳәа ҳаԥшуп. Иахьазы иалгароуп", - иҳәеит Џьергьениа.
Риҵатәи апарк ахылаԥшра-аушьҭырҭатә ҭыԥ ажьырныҳәа 20 инаркны аусура азԥхьагәаҭоуп.