АҞӘА, ажьырныҳәа 22 – Sputnik. Аԥсны инхо Аџьынџьтәылатә еибашьра Ду аветеран Валентина Шульгина 100 шықәса лхыҵра лыдырныҳәалеит урыстәылатәи аитәылауаа реидгылеи урыстәылатәи арратә база аоркестори, абри атәы аанацҳауеит РИА Новости.
Сталинградтәи аибашьра иалахәыз иахьа Аԥсны иаанханы иҟоу Шульгина заҵәык лоуп. Аибашьра Ду алагаанӡа Шульгина аҵара лҵон Омсктәи амедицина афельдшер-акушертә школ аҟны. Уи даналга 1942 шықәсзын афронт ахь дцеит, аибашьра зегьы асанитартә взвод адҵаҟаҵаҩын.
Аиубилиар лыҩны аҿаԥхьа адныҳәалара ҟаҵо иқәгылеит аиҿкаара анапхгаҩцәа, анаҩс урыстәылатәи арратә аоркестр амузыкантцәа аветеран лзы иадырҳәеит амузыкатә композициақәа.
Ақәгылара ашьҭахь аиҿкааҩцәеи ауснагӡатә алахәылацәеи Валентина Шульгина ашәҭқәеи аҳамҭақәеи лзынарышьҭит, илзеиӷьаршьеит агәабзиара, агәамч, анасыԥ, ақәранҵыра ду.
Валентина Шульгина - Аџьынџьтәылатә еибашьра Ду аветеран, Сталинградтәи аибашьра алахәыла, Аеҵәа ҟаԥшьқәа ҩ-орденк ланашьоуп, иара убас, Курсктәи аибашьраз "Агәымшәараз" амедал.