АҞӘА, ажьырныҳәа 23 – Sputnik. Аԥсны Ашахмат азы афедерациа еиҿнакааз раԥхьаӡатәи жәларбжьаратәи ашахматтә еицлабра "Аԥсны.Тамшь-Village 2022" аҩбатәи амш иалагеит.
Актәи амш азы х-турк мҩаԥган, нас ҩ-сааҭк аԥсшьара рыман, нас даҽа х-турк мҩаԥысит. Аҩбатәи амш азы убасҵәҟьа ф-раундк мҩаԥысраны иҟоуп, урҭ рылҵшәақәа рыла аиааира згази аԥхьахәқәа зырҭои еилкаахоит.
Тамшь имҩаԥысуа раԥхьатәи ашахматтә еицлабра алахәылацәа рыбжьара иҟоуп агроссмеистерцәа жәларбжьаратәи аицлабрақәа рҟны аиааира згахьоу реиԥш, ашахмат абзиабаҩцәагьы.Атурнир мҩаԥысуеит швеицариатәи асистемала 12 тур рыла, алахәылацәа алырхуеит акомпиутертә ҵәҭаԥсарала. Аиԥыларақәа мҩаԥысуеит 15 минуҭ ирылагӡаны.
Аицлабра "Аԥсны.Тамшь-Village 2022" мҩаԥыргоит аспорт азы Аԥсны Аҳәынҭеилакыи Аԥсны ашахмат азы Афедерациеи Аԥсны аҵареи абызшәатә политикеи рминистрра ацхыраара ала. Афинанстә цхыраара ҟарҵеит "Универсал банк", "А-мобаил", Гәылрыԥшь араион ахадара.
Sputnik Аԥсны аинформациатә дгылара анаҭоит Жәларбжьаратәи атурнир "Аԥсны.Тамшь-Village 2022".
"Тамшь-Village" - ари амшын аԥшаҳәаҿы игылоу 1000-ҩык зкуа ҳаамҭа иақәшәо коттеџьтә комплексуп, уи аргыларазы аинвестициақәа аланаҵеит урыстәылатәи атуристтә еилахәыра "Библио-Глобус". Иара аартын 2021 шықәса ԥхынгәымза алагамҭазы.