АҞӘА, ажьырныҳәа 25 – Sputnik, Бадри Есиава. "Аԥсны аерман уаԥшь" Приморсктәи абжьаратә школ автобус ҳамҭас иарҭеит, абри атәы Sputnik иазеиҭеиҳәеит Приморское ахада Алиас Габуниа.
"Фба-быжьба шықәса рыҩныҵҟа ахәыҷқәа ргара-раагаразы ауадаҩра ҳаман. Иҳамаз "Газель" акәын, аха атранспорт ажәит, ахәыҷқәа рныҟәгара шәарҭахеит. Азҵаара аӡбраҿы ацхыраара ҟарҵеит "Аԥсны аерман уаԥшь", дара ашкол автобус ҳамҭас иҳарҭеит", - иҳәеит иара.
Габуниа иҳәеит автобус аусура ишалагахьоу, Приморсктәи ашколқәа №1, №2 арҵаҩцәеи аҵаҩцәеи реиԥш, Гәдоуҭеи Абгархықәи рҵаҩцәагьы шныҟәнаго. Есыҽны автобус рхы иадырхәоит 35 – 40-ҩык.
Ашколтә автобус арныҟәцаҩцәа рулафахәыи абылтәи аԥара рхыршәаауеит Гәдоуҭа араион Ахадара аҵараҟәша.