АҞӘА, ажьырныҳәа 25 - Sputnik. Сҭампылтәи аҳаирбаӷәазаҟны иазгәаҭаз ареисқәа зегьы аанкылоуп аҳауатә ҭагылазаашьа иахҟьаны, абри атәы аанацҳауеит РИА Новости ателеканал A Haber ажәақәа ҵаҵӷәыс иганы.
"Ихадоу ажәабжьқәа: Сҭампылтәи аҳаирбаӷәазаҟны ареисқәа зегьы аанкылоуп", - ҳәа аанацҳауан ателеканал.
Урыстәылатәи атуроператорцәа ирымоу адыррақәа рыла, иахьазы Сҭампыл рыԥсы ршьоит 12 нызқьҩык аԥсшьаҩцәа, урҭ рахьынтә 1,5 нызқьҩык аҳаирбаӷәазаҟны ианыԥыруа ҳәа итәаны иԥшуп.
Ҭырқәтәыла еиуеиԥшым арегионқәа рҟны амшцәгьа иахҟьаны хыԥхьаӡара рацәала амашәырқәа ҟалеит. Аҳауагәаҭаҩцәа ргәырҽанырҵоит асоура ӷәӷәахоит ҳәа, мчыбжьык илеилоит ҳәа.