АҞӘА, жәабран 1 - Sputnik. Гәдоуҭа араион асанитартә ҳақьым хада Инга Ҷанԥҳа акоронавирус алаҵәара ахәшьара аҭо илҳәеит аҭагылазаашьа уадаҩуп ҳәа. Абри атәы аанацҳауеит араион ахадара асаит.
COVID-19 змоу рхыԥхьаӡара иацлоит. Амедусзуҩцәа рахьгьы ичмазаҩу рацәаҩуп. Ҷанԥҳа илҳәеит ишалшо ала ауаа рхы рыхьчаларц, ақыҭақәа реиҳабацәа алархәны имҩаԥгаз аилатәараҿы.
Араион ахада ихаҭыԥуаҩ Валери Аҩӡба ауааԥсыра рахь ааԥхьара ҟаиҵеит асанитартә ԥҟарақәа иқәныҟәаларц, асабрадақәа ныҟәыргаларц. Азхьаԥшра аиҭеит алаҵаҟаҵара шхымԥадатәиу. Абри аганахь ала, ауааԥсыра аинформациа-еилкааратә усура рыдҟарҵаларц рыдиҵеит ақыҭақәа рнапхгаҩцәа.
Аилацәажәараҿы ирзааҭгылан егьырҭ хра злоу азҵаарақәагьы, алашара ахархәараз аԥарашәара азҵаара аиԥш иҟоу. Аҩӡба иҳәеит, аԥара зымшәо ишрацәажәалатәу, аус шрыдулатәу.