АҞӘА, жәабран 4 – Sputnik. Америкатәи, британиатәи, естониатәи АИХқәа ркорреспондентцәа Донбасс "Урыстәылатәи ақәылара" ҳәа анҵамҭақәа дырхиоит ҳәа аанацҳауеит РИА Новости Лугансктәи Жәлар рреспублика Жәлар рмилициа аофициалтә хаҭарнак Иван Филипоненко иажәаәқа шьаҭас иҟаҵаны.
"Ҳаԥшыхәцәа иазгәарҭахьеит америкатәи, британиатәи, естониатәи АИХқәа ркорреспондентцәа Украина АМ 95-тәи абригада ахьгылоу араион аҿы рыҟазаара", - ҳәа иҳәеит иара.
Филипоненко иҳәеит Лугансктәи Жәлар рреспублика Жәлар рмилициа адыррақәа рыла абригада акомандир адҵа имоуп аҭыхратә гәыԥқәа ршәарҭадара аиҿкаара, мраҭашәаратәылақәа иддырбарц шакәу Урыстәыла аганахьала ақәылара шыҟоу ҳәа.
Луганскгьы ирҳәеит Киевтәи амчрақәа Донбасс ақәларазы рҽырхиарақәа хдыркәшоит ҳәа: аинырратә цәаҳәахьы арратә техника, Америкеи Британиеи рҟынтәи ироуз абџьар наргоит ҳәа.
Аҵыхәтәантәи амзақәа рзы Урыстәылеи Мраҭашәареи реизыҟазаашьақәа акыр еибарххоуп. Вашингтони Бриуссельи Москва Украина "иажәлоит" ҳәа ахара адырҵоит, уи инадҳәалангьы Мрагыларатәи Европа рыҟазаара дырҭбаауеит.
Кремль уи мап ацәнакуеит, иагьыргәаланаршәоит Киев Минсктәи аиқәшаҳаҭрақәа ишрықәымныҟәо.