АҞӘА, жәабран 10 – Sputnik. Аԥсны Адәныҟатәи аусқәа рминистр Инал Арӡынбеи Ихьыԥшым Аҳәынҭқаррақәа русқәеи, аҳәаанырцә инхо аџьынџьуааи, жәларбжьаратәи агуманитартә усеицуреи рзы Афедералтә маҵзура (Россотрудничество) аиҳабы Евгени Примакови еиԥылеит Москва, абри атәы аанацҳауеит аминистрра асаит.
Арӡынбеи Примакови реиԥылараан иалацәажәеит аусеицура еиҳа активла амҩаԥгара, Аԥсны аҿар инарҭбааны адгылара рыҭара, аинформациатә проектқәа реицымҩаԥгара ирызку азҵаарақәа.
Уи адагьы аганқәа инаҵшьны иазгәарҭеит Аԥсни Урыстәылеи рыбжьара аҵараҵаратә еимадарақәа рыҿиара аҵакы, иалацәажәеит урыстәылатәи аҵараиурҭақәа рҿы азанааҭтә еиҭазыҟаҵареи аҟазара аҳаракреи рзы аусмҩаԥгатәқәа шаҭаху.
Аԥсны Адәныҟатәи аусқәа рминистр Инал Арӡынба усутә ныҟәарыла Москва дыҟоуп жәабран 8 раахыс. Уа иара аканал RT англыз бызшәала аинтервиу аиҭеит, далацәажәеит Аԥсны аҭоурыхи иахьатәи амши ртәы.