АҞӘА, жәабран 11 – Sputnik, Бадраҟ Аҩӡба. Гәдоуҭатәи агоспиталь аҿы иаартхоит аҟәшацҵа акоронавирус змоу ачымазцәа рзы ҳәа иҳәеит Агәабзиарахьчара аминистр Едуард Быҭәба апресс-конференциаҟны.
"Иацы аӡбамҭа ҳадаҳкылеит аковид-чмазцәа рзы Гәдоуҭатәи агоспиталь аҿы аҟәша цҵа ааҳартырц", - иҳәеит иара.
Ачымазцәа рхыԥхьаӡара иазҳар, уахь инаагалоит ҳәа азгәеиҭеит аминистр.
Уаанӡа апресс-конференциаҿ Быҭәба иҳәахьан ачымазара акыр аҽшарҭбаазгьы ихьанҭоу ачымазцәа шырацәам.
Жәабран 11 азтәи адыррақәа рыла ахәшәтәырҭақәа рҿы ишьҭоуп 189-ҩык COVID-19 зцәа иалоу ауаа, 61-ҩык рҭагылазаашьа хьанҭоуп.