АҞӘА, жәабран 14 - Sputnik. Омикрон-штамм адуцәа реиԥш ахәыҷқәагьы ирыхьуеит, ишәарҭоу аҟазшьақәа аиургьы алшоит ҳәа иҳәеит Амилаҭтә медицинатә ҭҵаарадырратә центр адиректор Андреи Фисенко.
Фисенко иажәақәа рыла, авирус аштамм ҿыц алаҵәара ласы мзызны иазыҟоуп уи ахәыҷқәа уаанӡа аасҭа еиҳаны иахьрылаҵәо.
Уи адагьы, ачымазара еснагь ахы цәыргамкәа имҩасуам. Омикрон ашоура ҳарак, ахыхь, ашьаҳиҭра, аимҳәа, ахәдахьаа, зны-зынлагьы ацәақәыԥсареи амгәатареи ахылҿиаар алшоит.
"Иазгәасҭар сҭахуп, омикрон аиҳарак хыхьтәи аԥсыԥлагаҩагарҭақәа ааха шырнаҭо", - ҳәа иҳәеит Финенко.
Андреи Финенко аҽазныкгьы ауааԥсыра рахь аҳәара ҟаиҵеит ахдырра ҳарак аадырԥшырц, ахәыҷқәа рзы ишәарҭам аҭагылазаашьақәа аԥырҵарц. Уи азы адуцәа рхаҭа асабрадақәа ныҟәыргалароуп, ауаа рацәа рхы рцәырыхьчалароуп, асоциалтә дистанциа азгәарҭалароуп, иара убасгьы алаҵа ҟарҵалароуп.
Омикрон-штамм Аладатәи Африка иаарԥшын ииасыз ашықәс анҵәамҭазы. Иара даара ирласӡаны адунеи аҿы ирылаҵәеит.
Жәабран 13 рызтәи адыррақәа рыла аштамм Урыстәыла арегионқәа 84 рҿы игәаҭоуп.
Аԥсны агәабзиарахьчара аминистр иажәақәа рыла, арахь омикрон-штамм ааира ачымазара акыр иазнарҳаит. Иара алаҵәара аанкыларазы ашколқәеи ахәыҷбаҳчақәеи акарантин рылаҳәоуп.