АҞӘА, жәабран 16 – Sputnik. "Амшынеиқәафымцамч" афымцамч аҭира аусбарҭа аиҳабы Алхас Ҷанба Sputnik аҿы имҩаԥысуаз апресс-конференциаҿ иҳәеит аиурист хаҿқәеи акоммерциатә наплакқәеи афымцамч ахархәаразы иршәо ахәԥса еиҭакхоит ҳәа.
Ҷанба иажәақәа рыла, ахатәхаҿқәа рыхьчара алзыршо амеханизм аус адулара иаҿуп.
"Иҟоуп ажәалагала асоциалтә пакет аиҿкааразы. Арахь иаҵанакуеит ихьчам атәыла ауааԥсыра рхархәара асоциалтә норма, аквотақәа. Асоциалтә норма иаанагоит ахархәара амҽхак алимит аҭара", - ҳәа иҳәеит Ҷанба.
Алхас Ҷанба иазгәеиҭеит Аԥсны ишыҟоу азинҷыда змоу 23 категориа, урҭ рзеиԥш хыԥхьаӡара 7150-ҩык ыҟоуп. Дара азин рымоуп ахәԥсаԥараҟынтә 50% ашәара.
Афымцамчхараз иахьазы иҟоу ахәԥҵәақәа дрылацәажәо Ҷанба иазгәеиҭеит, шә-процентк ауааԥсыра аԥара еизыргозаргьы АУН аныхрақәа шазхымҩо.
Ҷанба еиҭеиҳәеит ашәҟәҭагаларатә система ишалнаршо ауадаҩрақәа рӷьырак аӡбра аԥареизгара аганахь ала.
Иахьазы ахатәхаҿқәа рзы киловаттк 0,4 мааҭ иаԥсоуп, аиурист хаҿқәа рзы - 0,85 мааҭ.
2021 шықәсазы афымцамч ахархәараз аԥареизгара 41,7% артәеит.
Ареспубликаҿ иалагалоу аамҭа-аамҭалатәи афымца арцәара далацәажәо Ҷанба иҳәеит ари ада ԥсыхәа шыҟамыз. Убри аан иазгәеиҭеит, афымцалашараз аԥарашәареи инарышьҭуа амчхареи шеидҳәалоу. Атәылауаа аԥарашәара иаҟәыҵыр ареспублика иамоу алашарагьы ацәыӡыр шалшо.
Уаанӡа атарифтә политика аԥсахра атәы далацәажәахьан аԥыза-министр ихаҭыԥуаҩ, Аекономика аминистр Кристина Озган. Лара лажәақәа рыла, афымцамчеиқәыршәара арманшәалараз иарбоу ауснагӡатәқәа ахәԥса аиҭакра адагьы аԥареизгара аизырҳара амеханизмгьы аҵанакуеит.