АҞӘА, жәабран 20 - Sputnik. Аԥснытәи аспортсменцәа Инал Берзениеи Денис Қәаранӡиеи аԥхьахәқәа ргеит зых иақәиҭу аиқәԥаразы Санкт-Петербург ачемпионат аҿы, убри алагьы ақалақь еизгоу акоманда иалалеит ҳәа аанацҳауеит Аԥсны Аҿари аспорти рзы аҳәынҭеилакы.
Аицлабрақәа мҩаԥысуан жәабран 19 рзы, урҭ рылҵшәақәа рыла Урыстәыла ачемпионат иақәшәо алырԥшаауан. Иалахәын 100-ҩык зых иақәиҭу аиқәԥаҩцәа акапантә категориақәа 10 рҟны.
Атурнир алҵшәақәа рыла, Инал Берзениа игеит актәи аҭыԥ зыкапан 86 кьыла иҟоу рыбжьара, Денис Қәаранӡиа - ахԥатәи аҭыԥ зыкапан 79 кьыла иҟоу рыбжьара.
Аԥснытәи ақәԥаҩцәа азыҟаиҵоит Ҭемыр Џьопуа.