АҞӘА, жәабран 22 – Sputnik. Аҟәатәи асасааирҭа "Аиҭар" ДЖәРи ЛЖәРи рҟынтәи ахҵәацәа раԥхьатәи ргәыԥ аднакылоит ҳәа аанацҳауеит "Апсныпресс".
Аԥсны ахада Аслан Бжьаниа инапынҵала аҩаша аԥыза-министр Александр Анқәаб аусутә еилацәажәара мҩаԥигеит Донецктәии Лугансктәии ареспубликақәа рҟынтәи ахҵәацәа рыдкыларазы.
Анқәаб иазгәеиҭеит ауаа рынхара, рыкрыфара, рмедицинатә цхыраара, рныҟәгара рызҵаарақәа зегьы ирызхәыцзарц, аиҳаракгьы ахәыҷқәа.
Ахҵәацәа раагара Аԥсны АҶА, Атуризм аминистрра рнапы ианҵоуп. АҶА ахада Донбассҟа амҩа дықәлахьеит.
Аҳәынҭмаҵзурақәа русура аиҿыбаареи аиҿкаареи инапы ианҵоуп аԥыза-министр ихаҭыԥуаҩ Сергеи Пустовалов.
Украина Донбасс иажәлоит ҳәа иҟоу ашәарҭаз уахьынтәи иқәгоуп аҳәса, абыргцәа, ахәыҷқәа. Уажәазы 70 000-ҩык рҟынӡа Урыстәыла ирыдыркылахьеит.