АҞӘА, хәажәкыра 1 – Sputnik, Бадраҟ Аҩӡба. Аԥсны аиҳабыреи Адыгатәыла аиҳабыреи рыбжьара ахәаахәҭра-економикатә, аҭҵаарадырра-техникатә, агуманитартә, асоциал-культуратә, аекологиатә усеицуразы Аиқәшаҳаҭра апроект Аминистрцәа реилазаараҿы ишьақәдырӷәӷәеит.
"Урыстәылатәи ҳколлегацәеи ҳареи лассы-лассы иазгәаҳҭалоит Урыстәылатәи Афедерациа асубиектқәеи ҳареи ҳабжьара аизыҟазаашьақәа рыҿиара аҵак ду шамоу. Аиҳаракгьы ари актуалра аҵоуп иахьатәи аҭагылазаашьаан", - ҳәа иҳәеит Аԥсны Адәныҟатәи аусқәа рминистр Инал Арӡынба.
Аиқәшаҳаҭраз апроект иазԥхьагәанаҭоит ааглыхра, агроааглыхратә комплекс, ахәаахәҭара, аҭҵаарадырра, акультура русхкқәа рҟны апрограммақәеи апроектқәеи аус рыдуылара ҳәа иҳәеит иара.
"Аԥсни Адыгатәылеи рыбжьара Аиқәшаҳаҭра иазԥхьагәанаҭоит арҭ апроектқәа рынагӡаразы аҭагылазаашьа маншәалақәа раԥҵара, еиуеиԥшым аусбарҭакәа рыбжьара аиныррақәа рымҩаԥгаразы", - ҳәа иҳәеит Арӡынба.
Аганқәа рыбжьара аусеицура мҩаԥысуеит 2022-2024 шықәсқәа рызтәи иазԥхьагәаҭоу ауснагӡатәқәа инарықәыршәаны. Аиқәшаҳаҭра анапаҵаҩра азин лаҭәашьахоит Аԥсны аекономика аминистр ҳәа иҳәеит Арӡынба.