АҞӘА, хәажәкыра 1 - Sputnik. Ашьапылампыл азы Жәларбжьаратәи Афедерациеи (ФИФА) Европатәи ашьапылампылтә федерациақәа Реидгылеи (УЕФА) урыстәылатәи акомандақәеи аклубқәеи атурнирқәа зегьы ирылыргеит ҳәа аанацҳауеит ФИФА асаит.
"ФИФА-и УЕФА-и аицыӡбамҭа рыдыркылеит: урыстәылатәи амилаҭтә командақәеи аклубқәеи жәларбжьаратәи атурнирқәа зегьы ирылыргоит ԥхьаҟа иҟало даҽа дыррак аҟынӡа. Ашьапылампыл Украина ааха зауз зегьы адгылара рнаҭоит. Аиҿкаарақәа рхадацәа (Александер Чеферин, УЕФА, Џьанни Инфантино, ФИФА. — аред.) ақәгәыӷуеит Украина аҭагылазаашьа хара имгакәа иҭышәынтәалап, ашьапылампылгьы акзаареи аҭынчреи ирхықәкны иҟалап ҳәа", - аҳәоит аҳәамҭаҿы.
Урыстәылатәи ашьапылампылтә Еидгыла (РФС) ФИФА-и УЕФА-и рыӡбамҭа иақәшаҳаҭым.
"Ари аҩыза аӡбамҭа еснагь аиҟарареи, аҳаҭыреиқәҵареи, аполитика ахьыԥшымреи рыпринципқәа ирықәныҟәоз адунеитә спорттә еилазаара еиҟәнашоит. ФИФА-и УЕФА-и рыӡбамҭа аҿагылара амҩаԥгара ахәҭаны иаабоит жәларбжьаратәи аспорттә зин анормақәа инарықәыршәаны", - ҳәа аҳәоит РФС арелиз.
Ашәахьа Жәларбжьаратәи Аолимпиптә комитет анапхгара аспорттә федерациақәа ирабжьнагеит урыстәылатәии белоруссиатәии аспортсменцәа рықәгылара мап ацәыркырц. Иазгәарҭеит арҭ атәылақәа рыспортсменцәеи ркомандақәеи анеитралтә статус рыҭара мацара шалшо, амилаҭтә гимнқәеи абираҟқәеи рхархәарада.