АҞӘА, хәажәкыра 2 - Sputnik. ЕАА урыстәылатәи аҳаирпланқәа рзы аҳауатә еимадара анаркуеит, абри азы аҳәамҭа ҟаиҵеит америкатәи ахада Џьо Баиден, аконгресс аҿы дықәгыло. Абри атәы аанацҳауеит РИА Новости.
Ахада есышықәса аконгресс ахь инашьҭымҭа аҩнуҵҟатә политикоуп изызку, аха уажәы иара Украина аҭагылазаашьа алацәажәара ала далагеит.
"Иахьа ишәасҳәоит, ҳҩызцәа егьырҭ реиԥш, америкатәи аҳауатә ҵакыра шаҳаркуа урыстәылатәи аҳаирпланқәа рзы, рекономика еиҳагьы ақәыӷәӷәара шаҳҭо", - иҳәеит иара.
Иазгәаҭоуп, аԥкрақәа рахь ишаҵанакуа ачартертә реисқәагьы. Абри аҩыза аинформациа ҟанаҵеит америкатәи атранспорт аминистрра.
Уаанӡа ЕЕ аҳаиртә ҵакыра анаркхьан Урыстәылазы. Аҭахкааратә политикеи аекономикатә санкциақәеи Урыстәыла аганахьала ирылагеит Владимир Путин донбасстәи ареспубликақәа рхьыԥшымра аназхаиҵа ашьҭахь.
Уи адагьы аилахәыра Boeing урыстәылатәи авиаеилахәырақәа рымаҵ аура мап ацәнакуеит.