АҞӘА, хәажәкыра 9 – Sputnik. Аԥсны Алхратә комиссиа хадаҟны Жәлар Реизарахь алхрақәа рахь аҽазыҟаҵарақәа ирҿуп, абри атәы иҳәеит АКХ алахәыла Алиас Бранӡиа.
Иажәақәа рыла, алхратә биуллетенқәа кьыԥхьуп, алхратә ҭыԥқәа рахь анагаразы ихиоуп. Акомиссиақәа рыҩнуҵҟа аиҿкааратә усурақәа цоит, анаԥшцәеи акандидатцәа рҟынтәи агәрагаҩцәеи аршаҳаҭгақәа рырҭоит.
"Иара убас акомиссиақәа ирыҭан абиуллетенҭаԥсарҭақәа (урны - аред.), урҭ рхыԥхьаӡараҿы иҟоуп инаргааргогьы. Ҽнак-ҩымш шыбжьоу алхратә комиссиақәа абиуллетенқәа шаны ирыҭахоит", - иҳәеит Бранӡиа.
Иара иазгәеиҭеит, аҭыԥантәи алхратә комиссиа алахәылацәа акоронавирус аҟынтәи аҽацәыхьчагақәа - асабрадақәа, анапҭарԥақәа, арзҩыдагатәқәа рыла еиқәыршәахоит.
Бранӡиа иажәақәа рыла, алхратә ҭыԥ хадақәа рҟны Аԥсны ААР аусзуҩцәа ыҟазаауеит. Иара убас АКХ аҟны апресс-центр аус аулоит.
Жәлар Реизарахь алхрақәа мҩаԥгахоит хәажәкыра 12 2022 шықәсазы. Апарламентахь иалххоит 35-ҩык адепутатцәа. Аԥсны Апарламент адепутатс дҟалар илшоит дарбанзаалак 25 шықәса ирҭысхьоу, алхратә зин змоу атәылауаҩ.
Жәабран 10 раахыс АКХ аҟны ашәҟәы иҭарыҩхьеит 123-ҩык акандидатцәа, урҭ рахьынтә 107-ҩык хацәоуп, 16-ҩык аҳәса. Бжьаратәла, адепутатк ҭыԥк ахь хҩык ықәгылоуп. Акандидатцәа зегь реиҳа иреиҵоу 25 шықәса ихыҵуеит, зегь иреиҳабы -75.