АҞӘА, хәажәкыра 9 - Sputnik. Visa урыстәылатәи аԥарахсаалагақәа аҳәаанырцә русура аҿҳәара даҽа мышкы ацнаҵеит – хәажәкыра 11 рҟынӡа ҳәа аҳәоит аилахәыра асаит.
Урыстәыла аҩнуҵҟа ахсаалагақәа рыҿҳәара ԥҵәаанӡа рхархәара алшоит. Аклиентцәа рыԥхьаӡамҭақәа рҿынтә аԥара ианырҭаху иҭыргоит.
Уаанӡа аилахәырақәа Visa, Mastercard Урыстәыла русура шааныркыло азы аҳәамҭа ҟарҵеит – асанкциақәа ирыҵаркыз абанкқәа рыхсаалагақәа рҭыжьра иаҟәыҵит, иара убасгьы аҳәаанырцә онлаин-дәқьанқәа рҟны аахәамҭақәа ахә рыхшәаара ҟалом Apple Pay, Google Pay рхархәарала.