АҞӘА, хәажәкыра 16 – Sputnik. Ахатәы ҩны блит Гагра араион Чагрыԥшь ақыҭан ҳәа аанацҳауеит Аԥсны АҶА апресс-маҵзура.
Амцакра ҟалеит ҳәа АҶА аҷаԥшьаҩ иахь аҭел иасит асааҭ 15:36 рзы аҩашаҽны.
Арыцҳара ахьыҟалаз аҭыԥ ахь инеит амцарцәага машьынақәа ԥшьбеи аиқәырхаратә гәыԥи.
Амцарцәаҩцәа ирылшоз зегь шыҟарҵазгьы аҩны зегь блит. Абылраан аӡәгьы машәыр имыхьӡеит.
Заанаҵтәи адыррақәа рыла, амцакра арԥхагатә маруга иахҟьеит.