АҞӘА, хәажәкыра 17 - Sputnik. Урыстәыла ахада Владимир Путин Алексеи Двинианин имаҵзураҟынтәи ихы дақәиҭитәит ҳәа аанацҳауеит азинтә информациа аинтернет-портал.
"Двинианин Алексеи Аркади-иԥа Аԥсны Аҳәынҭқарраҟны Урыстәылатәи Афедерациа азинмчнагӡеи анапынҵа ҷыдақәеи змоу ацҳаражәҳәаҩыс дахьыҟаз аҟынтә ихы дақәиҭтәызааит", - аҳәоит ахада иусԥҟа.
Алексеи Двинианин Урыстәыла ахада Владимир Путин идҵала ари амаҵзура дахаргылан 2018 шықәсазы. Уаанӡа иара Урыстәыла ААР аҿы ИАР атәылақәа аԥшьбатәи рдепартамент адиректор ихаҭыԥуаҩыс дыҟан.
Абри аҭыԥ аҿы иара диԥсахит Семион Григорев жьҭаара 25, 2008 шықәса инаркны хәажәкыра 30, 2018 шықәсанӡа Аԥсны иҟаз.