АҞӘА, хәажәкыра 18 – Sputnik. 2021 шықәсазы Аԥсны аҳазалхратә усбарҭа ҩ-миллиардк инареиҳаны ашәарақәа ахыԥхьанаӡалеит, аплан 127% рыла инагӡоуп, абри атәы аилатәараҿы иҳәеит Аҳазалхратә еилакы ахантәаҩы ихаҭыԥуаҩ Алиас Лабахәуа.
2020 шықәсеи 2021 шықәсеи еиҿурԥшыр, ахашәалақәа 40% рыла еизҳаит, 2019 шықәса иаҿурԥшуазар - 46% рыла.
Аҳазалхратә еилакы ахантәаҩы Оҭар Хьециа иазгәеиҭеит, 2021 шықәсазы аилак аусура аекономика ашәарҭадареи, аҳәынҭбиуџьеҭ ахарҭәаареи, аконтрабанда аҿагылареи, жәларбжьаратәи аизыҟазаашьақәа рырӷәӷәареи ишазырхаз.
Хьециа иажәақәа рыла, аилак ахь аусуразы аконкурс иахыжьны ирыдыркылеит 20-ҩык, уи иалныршеит аусзуҩцәа рыхәҭак арҿыцра.