АҞӘА, хәажәкыра 26 – Sputnik. Аԥсны аԥыза-министр Александр Анқәаб аминистррақәа рнапхгаҩцәа Аԥсни Урыстәылеи рзакәанԥҵарақәа реишьашәаларазы анормативтә ршаҳаҭгақәа аус рыдулара дырццакырц рнапы ианиҵеит. Абри атәы аанацҳауеит Аԥсны аекономика аминистрра апресс-маҵзура.
"Апрограмма анагӡара хымԥадатәиуп, избанзар уи ҳауаажәлар рыԥсҭазаара аиӷьтәра иазырхоуп. Иазыԥҵәоу аҿҳәарақәа ирхыԥар ҟалом. Урыстәылатәи ҳколлегацәеи ҳареи ҳусеицураҟны ус еиԥш ҟамлароуп", - иҳәеит аԥыза-министр, иагьациҵеит аусутә гәыԥ алахәылацәа зегьы аҭакԥхықәра шрыду.
Аԥсны аԥыза-министр ихаҭыԥуаҩ, аекономика аминистр Кристина Озган аилатәараҟны илҳәеит аԥсуа гәыԥ аҿаԥхьа асоциалтәи, атәанчахәытәи, агәабзиарахьчареи, аҵарадырреи русхққәа рзы анорматив-зинтә ршаҳаҭгақәа реиқәыршәараҿы ауадаҩрақәа шыҟоу.
Иара убас Озган илҳәеит, аусутә гәыԥ алахәылацәа Аԥсни Урыстәылеи ирзеиԥшу асоциалтәии аекономикатәии ҵакыра ашьақәыргыларазы иҟарҵахьоу шырацәоу.
Ҳазҭоу ашықәс азы аԥсуа ган ихдыркәшароуп аус здыруло Аҳазалхратә Кодекс, аҳәынҭбаџь азы Азакәанеидкыла, аинвестициа аусхк азы апроект, ашәахтә закәанԥҵара, агәабзиарахьчара, аҵарадырра, иара убас ҩ-тәылауаҩрак амазаара азҵаарақәа рҭышәныртәаларази атәылауаа атәанчахәы ала реиқәыршәарази аиқәшаҳаҭрақәа.