АҞӘА, хәажәкыра 28 – Sputnik. Аҟәа Аҳабла ҿыц аҟны ацхыраара лас аусура хацнаркит ашәахьа хәажәкыра 28 азы ҳәа аанацҳауеит ақалақь ахадара аофициалтә портал.
Аҳҭнықалақь ацхыраара лас аҳақьым хада Аслан Џьопуа иажәақәа рыла, зусура хацзыркыз амедицинатә гәыԥ рымаҵ руеит Аҳабла ҿыци аихамҩа авокзал азааигәареи инхо ауааԥсыра.
Аҳақьым дызҭаххо рзы аҭелқәа аус руеит 003 ( амобилтә), 03 (аҩнытә). Ацхыраара лас зҭаху рзы арҭ ателқәа аус руеит Аҟәа ақалақьи Аҟәа араиони иахьрыҵанакуа.
Уаанӡа Аҟәа ақалақь ахадара ацхыраара лас ахыбра арҽеиратә усурақәа азуны апандемиа аамҭазы акоронавирус азы ПЦР-тестқәа ахьарҭо аҭыԥ алхны иҟарҵеит, аха ареспубликаҟны ачымазара маҷк ианҭышәантәала ацхыраара лас аусура хацнаркит.