АҞӘА, хәажәкыра 28 - Sputnik. Урыстәыла Ашьха Ҟарабах аҭагылазаашьаҿы ихадараны иашьоит аинышәара арежим ақәныҟәара ҳәа аанацҳауиет РИА Новости Урыстәыла ахада ипресс-маӡаныҟәгаҩ Дмитри Песков иажәақәа ашьаҭас иҟаҵаны.
"Ари азҵаара арратә напхгара алацәажәароуп. Дара азербаиџьантәии ермантәылатәии аганқәа ирыҿцәажәоит. Уажәазы ҳәарада ихадоу аинышәара арежим ақәныҟәароуп аганқәа рыҩбагьы рганахь ала", - иҳәеит Песков.
Хәажәкыра 24 - 25 азербаиџьантәи аган аԥырҩы дызҭам ахархәага Байрактар-ТБ2 ала Ҟарабах, аиланхарҭа Фурух ԥшьынтә иалахысит ар ахьгылаз иарбаны.
Хәажәкыра 26 Ашьха-Ҟарабах ахада Араик Арутиуниан аусԥҟа инапы аҵеиҩит аибашьратә ҭагылазаашьазы аамҭала азинқәеи ахақәиҭрақәеи ԥкызарц азы.
Урыстәылатәи аган ацәажәара ашьҭахь азербаиџьантәи ар Фурух иалҵит. Абжьаҟазаҩцәа реилазаареи аимак алахәылацәа рхаҭарнакцәеи аҭагылазаашьа аҭышәныртәаларазы ауснагӡатәқәа мҩаԥыргоит.