АҞӘА, хәажәкыра 30 - Sputnik. Урыстәылатәи ар украинатәи Су-24 белоруссиатәи аҳәаа ааигәара икарыжьит ҳәа абрифинг аҿы иҳәеит Урыстәыла ААР аофициалтә хаҭарнак, аинрал-маиор Игор Конашенков.
"Ровентәи аобласт аиланхарҭа Тумень аҟны, украина-белоруссиатәи аҳәаа ааигәара Украина арра-ҳаиртә мчрақәа рҳаирплан Су-24 кажьын", - иҳәеит Конашенков.
Урыстәыла аҳауа-космостә мчрақәеи аракетатә ари уахыки-ҽнаки рыла 64 Украина арратә обиект ааха рырҭеит.
"Мышкы ала аоператив-тактикатә авиациеи аракетатә ари Украина арратә обиекқәа 64 ааха рырҭеит: Николаевтәи аобласт аиланхарҭатә ҭыԥ Березниговатое аҿы адҵаҟаҵаратә пунктқәа ԥшьба, азенит-ракетатә комплексқәа хԥа - Житомиртәи аобласт ақалақь Малин аҿы С-300 (акы), "Бук-М1" Угледари Славиански рҿы (ҩба)", - иҳәеит иара.
Уи адагьы, иҭархан ареактивтә системақәа хԥа, артиллериатә батареиақәа ҩба, ари атехникеи ргыларҭақәа 49.
Аоператив-тактикатә ракетатә комплекс "Искандер" ала иԥжәан аџьаԥҳанышьҭаҵарҭақәа ҩба Донецктәи аобласт Каменка иахьаҵанакуа. Аҳауаҟынтә иԥжәан абылтәыҵәахырҭақәа Староконстантиновкеи Хмельницкии араионқәа рҿы.