АҞӘА, хәажәкыра 31 - Sputnik, Сариа Кәарцхелиаԥҳа. Урыстәылантәи Аԥсны иаиуа афымцалашара аанкылахоит хәажәкыра 31 асааҭ 23:00 инаркны, абри атәы Sputnik акорреспондент илзеиҭеиҳәеит "Амшынеиқәафымцамч" апресс-маӡаныҟәгаҩ Алхас Гагәылиа.
Авольтҳарак цәаҳәа "Ԥсоу-220" ала Урыстәылантәи иаауа афымца аанкылахоит ихәеит Гагәылиа. Убри инамаданы алашара аиура ахсаала ԥсаххоит: Аԥсны ахәҭак алашара аиулоит Авольтҳарак цәаҳәа-110 "Гечрыԥшь" аҟынтәи, аҩбатәи ахәҭа ЕгрыГЕС аҟынтәи иҳәеит иара.
Гагәылиа иажәақәа рыла, Џьуартәи аӡеизакырҭаҿ аӡы шылаҟәыц иаанхоит макьана. Аха убри аана аӡы маҷ- маҷ ацлара иаҿуп. Иааиуа амшқәа рзын иацлап ҳәа агәыӷра ыҟоуп. Аӡеизакырҭаҿ аӡы азымхакәан иҟалар, ЕгрыГЕС аусура аԥкрақәа алагалахоит.
Аԥсны афымцалашара Урыстәылантәи иаиуеит 2021 шықәса ԥхынҷкәынмза 18 аахыс.