АҞӘА, мшаԥы 3 - Sputnik. Анационалисттә баталионқәа рлахәылацәа агуманитартә цхыраара рымырхуеит дара рнапаҿы иҟоу Донбасс аҵакырақәа рҿы инхо аҭынч уааԥсыра, абри азы аҳәамҭа ҟалҵеит РИА Новости аинтервиу азҭоз ЛЖәР ауаҩы изинқәа рыхьчаразы азинмчы змоу Викториа Сердиукова.
Лара иазгәалҭеит Украина аҵакыраҟынтәи аамҭа-аамҭала агуманитартә цхыраара рыманы амашьынақәа шнеиуа, ауаа урҭ ргаразы ианнеилак, анацбаталионқәа рлахәылацәа рабџьар рыманы инкылсуеит ҳәа.
"Дара урҭ агуманитартә цхыраара ргар руам, рхазы иаашьҭхны иргоит. Ус изныкымкәа иҟалахьеит, ҳара уи аадыруеит ара иҟоу ауааԥсыра рҟынтәи", - лҳәеит аомбудсмен.
Сердиукова иара убас еиҭалҳәеит Киев анапаҿы иҟоу Северодонецк, Рубежныи, Кременнои рҿы украинатәи аибашьцәа ауааԥсыра аҩнаҵаҟақәа рҽахьырҵәахуаз ишдәылырцоз аиҿахысрақәа раан.
Хәажәкыра 24 раахыс Украина абџьарахыхра амҩаԥгаразы арратә аоперациа ҷыда цоит. Урыстәыла ахада Владимир Путин иҳәеит уи хықәкыс ишамоу киевтәи арежим аҟынтәи аашықәса агеноцид иҭагылоу ауааԥсыра рыхьчара. Урыстәылатәи Арбџьармчқәа икылкааны иқәыргоит арратә хыбрақәа, аҭынчуааԥсыреи аграждантә инфраструктуреи ԥырхага рымҭакәа.